～《婚前準備班》～
意大利嘅神父同我哋講，如果我哋唔參加教堂舉行嘅婚前準備班，就唔可以用宗教儀式行禮。但我同意佬年多前不斷來回歐洲亞洲非洲，根本冇機會確保連續三個月嘅星期日可喺意大利上堂。
Father了解咗我哋嘅情況後酌情處理，俾我哋三個月時間喺阿根廷揾間有提供婚前班嘅教堂搞掂佢兼乖乖攞埋証書，咁就可喺教堂鄧櫈櫈櫈......
呢個世界其實仍有好多國家缺乏資訊科技，貢雕鑽要揾到一間有堂上嘅教堂，上網，梗係揾唔到啦！我同意佬用咗唯一方法：逐間拍門。唔係主教堂所以冇辦課程、只接受喺同一教堂行禮、今個月冇班開...種種原因都聽過了，我覺得個天好似要考驗我哋究竟有幾大決心結婚咁。拍門拍足6間教堂，原來真係只要有恆心，鐵柱磨成針！終於揾到教堂肯收我哋😭
準備班朝9上到晚8，我哋都係諗住疊埋心水啪定齋啡入去坐一日收工！
成班有8對準新人，7對本地人，咁另外一對就係我哋...言歸正傳，本以為要帶筆帶紙抄碌屎，竟然出乎預料整日好似返咗playgroup咁，有遊戲玩，有小組討論，亦間中有兩個以為人母嘅導師講道理。玩遊戲其次，透過每個環節帶俾準新人值得思考嘅題目，實在不可或缺。
每對情侶有一條紅繩打蛇餅咁黐喺張白紙度，紅繩長度相等於兩個人由結識到步入教堂。繩長50厘米，如拍拖5年即1年10厘米，導師叫我哋喺每個轉捩點打一個結，寫低呢個結代表什麼。
假如彼此曾有經歷近乎分手嘅時刻，請喺適當位置再打多個大結，寫低為什麼會面臨分手。
小組討論吓以前阿爺阿嫲嗰代嘅夫妻關係如果？現今嘅情侶又有何不同？
請各人諗一樣對方送俾自己最珍貴嘅禮物。
更多環節，不能盡錄。
條紅繩，我同意佬喺要離開香港嘅時候打咗個結，喺決定去埃及返工同要置業之際又打多兩個結。當情侶們商討好後都會圍埋一大堆人做分享，導師往往用我哋做參考例子，話「呢個港女同意大利男就係最好嘅例子」因為我萬萬想不到，自我識意佬以來，從來都唔會喺一堆朋友何況係陌生人面前表達情感嘅意佬，竟然開金口對住廿個人講：
「喺呢幾年嚟，我帶住阿港女離開香港去北京，然後面前有泰國/埃及兩個國家揀，但港女知道我去埃及做嘢對我嘅事業有更穩健嘅基石，佢沒半點猶豫放棄泰國嘅日光浴生活而陪我到一個每日知道自己仍存活已是幸運的國家。到後來我有置業打算，佢傻氣得以為我一心金屋藏嬌沊低佢一個人喺意大利，亦或許大家喺埃及過嘅日子真的唔容易，剎那間佢覺得自己已只是一個個體，遠離了家人沒有了群體生活，換來一間屋四面牆，倒不如返香港算數。而今日阿港女坐喺我隔離，那不是知道將會去一個自己語言不通，冇朋友冇親人嘅國家？我好感激亦好欣賞佢嘅勇氣。」
「以前祖父母嗰代唔係盲婚啞嫁就終日為口奔馳，而男主外女主內嘅思想亦造就成大男人主義，女人湊仔洗衫煮飯天經地義，只知需要做乜而唔係自己想做乜。依家男女平等，女的絕對擁有自己的想法，而阿港女絕對有權提出唔再跟我東奔西跑但今日佢依然不離不棄咁喺我身邊。咁耐以嚟，遠離亞洲更需要費功夫適應由北歐到南美的文化一定係阿港女唔係我。呢份堅持，當佢答應我放低香港擁有嘅一切，陪我浪跡天涯，正正係佢送俾我最珍貴嘅禮物。」
聽到呢度我嘅眼下瞼已裝唔哂我嘅淚水，我又何嘗唔感激意佬一直對我嘅包容？導師講得啱，生活節奏，工作壓力，雙方家人甚至搞婚禮嘅壓力令情侶們好多時忘記咗愛的可愛之處，但只要雙方一個願意講另一個願意聽，你會重新發現面前的對方有多愛你。
有時候事情嘅發生，就意外地被完美安排得令人難以置信。一個亞洲一個歐洲，偏偏我哋會喺南美洲一個好願意表達情感嘅國家參加婚前準備班，亦多少因爲意佬冇意大利father嚴肅地眼厲厲住佢，可以放下拘謹由衷的表達佢對我嘅愛意。
雖然當日個班全程用西文，意佬密密喺則邊翻譯之外，導師同情侶們亦好俾心機聽我用英文分享。記得求婚嘅晚餐好浪漫，記得一齊去邊度邊度旅行，對我哋嚟講，好好記住呢一課，終生受用。
勿忘初衷，學習如何愛與被愛，共諧連理，白頭偕老。
#OurMarriagePreparationCourse
#learnHowtoLoveandBeLoved
#共諧連理白頭偕老
#婚姻的學問
#學習愛與被愛
#港女與意佬的愛情故事
Search